醜聞‧大話

今日睇facebook有呢個好有創意嘅post：

真係欣賞佢嘅聯想力。

人係人，唔係神，總會犯錯，但係唔緊要，最重要係學識點樣去面對。如果係公眾人物，更加要小心，一舉一動都會成為焦點。唔係一定要去樹立榜樣，但係都唔好教壞細路。

當然佢嘅政綱冇話唔可以講大話，但應對能力，對於一個地方嘅首領真係好重要。揭醜聞呢家嘢，响絕大多數嘅選舉都會發生，唔好話美國，就算隔離台灣，真係鑊鑊新鮮鑊鑊甘，但人地面對醜聞價嘅能力真係得體好多。

點解人地答得咁好咁得體？呢個可能同能力有關，但唔可以忽視成個團隊。冇一個人可以獨自處理成個地方，一定要一班人。噉究竟係佢同佢嘅團隊溝通有問題，定係佢嘅團隊幫唔到佢？又或者佢覺得自己絕對攪得掂，唔駛人幫？

如果係佢同團隊溝通有問題，死火，自己揀都溝通唔到。如果係佢嘅團隊幫唔到佢，唉，咁細un嘅嘢都做得唔好，第日點選政府班底。如果係覺得自己絕對攪得掂，噉香港就真係冇乜希望，慘過董年代。

當然佢唔係後者，佢有搵人幫，只不過冇乜人睇得過眼佢嘅做法。（佢老婆真係好偉大，犧牲小我，完成大我。）
 
講大話真係要好有能力，唔單只要有急才、口才、演技，仲要記性好，記得先前講過嘅嘢，如果冇噉嘅'talent'，最好都係慳噃。

不過我諗佢都學到，所以依家揀唔答。
 
如果佢唔選特首，其實真係可以'一笑置之'...
 


志雲大師好嘢！